Sagrada Familia-kirkjan og fleiri þekkt minnismerki í Barcelona voru meðal þeirra staða sem hryðjuverkahópurinn, sem stóð fyrir árásinni í Barcelona og Cambrils í síðustu viku, ætlaði að beina aðgerðum sínum gegn. 

BBC segir þetta hafa komið fram í vitnisburði eins fjórmenninganna sem komu fyrir dómara í dag. Mohamed Houli Chemlal viður­kenndi fyr­ir dóm­ara í Madrid í dag að hann og fé­lag­ar hans hefðu skipu­lagt stærri árás­ir.

Houli Chemlal slasaðist þegar gassprenging varð í húsi í Alcanar á miðvikudagskvöldið í síðustu viku, þar sem hryðjuverkahópurinn var að útbúa gassprengjur. Daginn eftir ók hluti hópsins flutningabíl á gangandi vegfarendur á Römblunni í Barcelona með þeim afleiðingum að 13 manns létu lífið og yfir hundrað slösuðust. Þá ók hluti hópsins síðar um kvöldið á gangandi vegfarendur í strandbænum Cambrils og særði sex, auk þess sem einn þeirra stakk konu með hnífi. Hún lést síðar af sárum sínum.

You­nes Abouya­aqoub, sem keyrði flutn­inga­bílinn inn í mann­mergð á Römblunni, stakk síðar til bana ökumann bíls sem hann stal til að flýja af árásarvettvangi. Hann var drepinn af lögreglu í gær.

Átta félagar í hryðjuverkahópnum er nú látnir, tveir fórust í sprengingunni í Alcanar og sex voru skotnir af lögreglu, m.a. fimmmenningarnir sem óku á vegfarendur í Cambrils.

Þeir fjórir sem nú eru í haldi lögreglu sæta nú hámarksöryggisgæslu í fangelsi, en dómari úrskurðaði í dag að Mohammad Aalla, eigandi bifreiðarinnar sem notuð var til að aka á vegfarendur í Cambrils, skyldi látinn laus. Sagði dómarinn í úrskurði sínum að ekkert benti til þess á þessu stigi að hann hefði átt þátt í árásinni, utan þess að hafa lánað bróður sínum bílinn.

Honum er þó bannað að yfirgefa Spán og er gert að gefa sig reglulega fram við lögreglu.

Tengdar fréttir

Hryðjuverk í Barcelona

Óhapp varð mörgum til bjargar

• Skutu vopnaðan mann á lögreglustöð
• Sýna undirbúning Barcelona-árásarinnar
• Handtekinn vegna árása á Spáni
• Munir til minningar færðir á safn

» Fleiri tengdar fréttir

• Blogga um frétt