50% skotárása tengjast heimilisofbeldi

Tvær mannskæðustu skotárásir sem hafa átt sér stað í Bandaríkjunum á þessu ári eiga það sameiginlegt að eiga rætur að rekja til heimilisofbeldis. Í báðum tilvikum árásarmaðurinn ósáttur fyrrverandi eiginmaður og skotmarkið fyrrverandi eiginkona sem var farin að lifa lífinu á ný eftir að hafa sótt um skilnað. Átta einstaklingar létust í hvorri árás, langflestir ættingjar og vinir kvenanna.

Önnur árásin átti sér stað nýlega, þegar Meredith Hight, bauð vinum í mat, heima hjá sér í bænum Plano í Texas. Hún hafði sótt um skilnað frá eiginmanni sínum nokkrum mánuðum áður og hlakkaði til að hefja nýtt líf án hans. Þetta var fyrsta tækifærið sem hún hafði fengið í langan tíma til að bjóða vinum sínum heim. Hennar fyrrverandi var hins vegar ekki sáttur við það.

Skotið á vini og ættingja

Samkvæmt upplýsingum sem Huffington Post hefur frá lögreglunni í Plano hóf Spencer Hight, skotárás á heimili fyrrverandi konu sinnar um klukkan átta að kvöldi og skaut á hana og vini hennar. Þegar lögreglan kom á staðinn voru átta látnir og tveir slasaðir. Einn lést síðar af sárum sínum á sjúkrahúsi. Meredith var meðal hinna látnu. Lögreglan skaut Spencer á vettvangi.

Hin árásin átti sér stað í maí síðastliðnum á sveitabæ í Missisippi. Þar hafði Sheena Godbolt afdrep hjá móður sinni, eftir að hafa sótt um skilnað frá eiginmanni sínum nokkrum vikum áður. Líkt og Meredith notaði hún tækifærið, laus úr hjónabandinu, og bauð nokkrum fjölskyldumeðlimum, heim til móður sinnar í mat. Willie Cory Godbolt, fyrrverandi eiginmaður Sheenu, kom að bænum þetta kvöld og hóf skothríð. Hann myrti móður hennar, eldri systir, frænku og lögreglumann sem kom á staðinn. Hann keyrði síðan að tveimur öðrum bæjum í nágrenninu og myrti fleiri fjölskyldumeðlimi fyrrverandi konu sinnar. Þegar hann hafði lokið sér af lágu átta manns í valnum. Willie bíður nú dóms.

Árásarmaðurinn gjarnan sýnt skapgerðarbresti

Samkvæmt gögnum sem samtökin Everytown for Gun Safety hafa safnað saman um skotárásir þar sem fleiri en fjórir hafa látist, er það enginn tilviljun að tvær mannskæðustu árásir ársins eigi það sameiginlegt að tengjast heimilisofbeldi. Á árunum 2009 til 2016 voru 54 prósent skotárása í Bandaríkjunum þess eðlis að árásarmaðurinn skaut á núverandi eða fyrrverandi maka, eða fjölskyldumeðlimi. Í næstum helmingi þessar tilfella hafði árásarmaðurinn sýnt merki um alvarlega skapgerðarbresti áður en árásin átti sér stað. Beitt heimilisofbeldi, hótað ofbeldi eða virt nálgunarbann að vettugi.

Það er of snemmt að segja til um hvort það hafi verið tilfellið í árásinni í Plano en árásarmaðurinn í Missisippi hafði verið sakaður um heimilisofbeldi og sætti nálgunarbanni.

Á þessu ári hafa að minnsta kosti sjö skotárásir átt sér stað í Bandaríkjunum, samkvæmt gögnum Everytown, þar sem fleiri en fjórir hafa látið lífið. Í fimm tilfellum er staðfest að heimilisofbeldi hafi komið við sögu. Talsmaður samtakanna segir þessi mál þó ekki fá jafn mikla fjölmiðlaumfjöllun og skotárásir þar sem árásármaðurinn skýtur á handahófskennt á gangandi vegfarendur, eða tengist hryðjuverkasamtökum.

• Blogga um frétt