Ed Murray, borgarstjóri Seattle í Washington í Bandaríkjunum, hefur sagt af sér eftir að fimmti einstaklingurinn sakaði hann um kynferðislegt brot gegn sér í æsku. Sá fimmti var frændi hans Joseph Dyer sem sagði að brotin hafi átt sér stað árið 1970 þegar hann var 13 ára og deildi herbergi með Murray sem var sjálfur 15 ára.
Murray er 62 ára gamall og greindi frá afsögn sinni í gærkvöldi. Murray er samkynhneigður og í sambúð. Hann hafði áður gefið það út að hann muni ekki bjóða sig fram til endurkjörs fyrir demókrata.
„Þrátt fyrir að allar þessar ásakanir séu rangar þá er það mikilvægt að persónuleg mál mín hafi ekki áhrif á stjórnun borgarinnar.“ Þetta sagði Murray í tilkynningu.
Dyer sagði að brotin hafi átt sér stað á heimili sínu og móður hans í New York á meðan móðir hans var sjálf heima við. Misnotkunin stóð yfir í eitt ár en lauk þegar drengur á kaþólsku heimili þar sem Murray vann á þeim tíma sakaði hann um kynferðislegamisnotkun. Þetta kemur fram í frétt The Seattle Times. Murray hefur vísað þessu á bug og sagt ástæðuna fyrir ásökunum frænda síns vera vegna fjölskyldudeilna.
Fyrr á þessu ári lagði 46 ára maður fram kæru gegn borgarstjóranum en hann segir hann hafa greitt sér fyrir kynlíf þegar hann var aðeins 15 ára gamall. Þar sem hann hafi verið háður eiturlyfjum hafi hann verið reiðubúinn „til að gera hvað sem er“ fyrir 10-20 dollara.
Samkvæmt kæru mannsins hittust hann og Murray nokkrum sinnum.