Franska lögreglan handtók um helgina fimm manns, þar af einn sem er á lista yfir mögulega hryðjuverkamenn, í París. Fólkið var handtekið eftir að heimatilbúin sprengja fannst í einu af fínasta hverfi borgarinnar.

Íbúi í Porte d'Auteuil hluta 16. hverfis hafði samband við lögreglu aðfararnótt laugardags eftir að hann sá tvo gaskúta í anddyri hússins sem hann býr í. Við þá var festur farsími sem enn er til rannsóknar hjá tæknideild lögreglu. Þegar lögregla kom á vettvang fundust tveir gaskútar fyrir utan húsið. Er talið að farsíminn hafi átt að kveikja á sprengjunni.

AFP

Gérard Collomb innanríkisráðherra segir að einn hinna handteknu hafi verið á lista lögreglunnar yfir meinta hryðjuverkamenn. „Þetta sýnir að hættan er enn veruleg í Frakklandi,“ sagði hann í útvarpsviðtali í morgun. Mikilvægt sé að áfram gildi hörð öryggislög í landinu en tekist er á um það á franska þinginu í dag. Löggjöfin, sem hefur verið í gildi undanfarin ár veitir lögreglu og stjórnvöldum mun meiri völd en venjulegt er og hefur þetta verið harðlega gagnrýnt af mannréttindasamtökum og sérfræðingum hjá Sameinuðu þjóðunum.

Alls hefur 241 látist í árásum vígamanna í Frakklandi frá árinu 2015. Komið hefur verið í veg fyrir á annan tug árása það sem af er árinu. 

Tengdar fréttir

Hryðjuverk í París

Fresta hryðjuverkaréttarhöldum vegna glerkassa

• Sakfelldir fyrir að stela listaverki eftir Banksy
• Veiran frestar réttarhöldum í hryðjuverkamáli
• Tuttugu fyrir rétt vegna hryðjuverka í París
• Grunaður um aðild að árásum í París

» Fleiri tengdar fréttir

• Blogga um frétt