37 látnir í flóðum og aurskriðum

Yfirvöld í Víetnam segja að 37 manns hafi látist í flóðum og aurskriðum í kjölfar mikilla rigninga í landinu. Að minnsta kosti 40 er saknað og þúsundir hafa þurft að yfirgefa heimili sín, en hitabeltislægð gengur nú yfir mið- og norðurhluta Víetnam. BBC greinir frá.

Blaðamaður sem var að fjalla um flóðin er meðal þeirra sem saknað er, en hann hvarf í vatnselginn eftir að brú sem hann stóð á hrundi.

Tvö héröð í norðurhluta landsins hafa orðið verst úti, Yen Bai og Hoa Binch. Þar hafa orðið margar aurskriður sem hafa hrifið heimili fólks með sér og kostað fjölmarga lífið.

Hundruð víetnamskra hermanna sinna nú björgunar- og leitarstörfum, en yfirvöld hafa gefið út að allt kapp verði lagt á að leita af þeim sem saknað er.

• Blogga um frétt