Ýmislegt lagt á sig fyrir ástina

Frönsk kona hefur verið dæmd í sex mánaða skilorðsbundið fangelsi fyrir að hafa logið því að henni hafi verið rænt svo að hún gæti eytt tíma með elskhuga sínum. Gríðarlega umfangsmikil leit var gerð að konunni þegar tilkynnt var um mannránið.

Dómari í bænum Mende fyrirskipaði konunni, Sandy Gaillard, sem er 25 ára aðgerðasinni og starfar fyrir frönsku Þjóðfylkinguna, Front National, að greiða fimm þúsund evrur í sekt og leita aðstoðar hjá sálfræðingi.

Gaillard, sem var skilin við eiginmanninn, bjó með unnusta sínum í bænum Rieutort-de-Randon og átti í ástarsambandi við þann þriðja.

Það var sambýlismaðurinn sem hafði samband við lögreglu eftir að hafa fengið sms frá Gaillard þar sem hún sagði að sér hefði verið rænt og komið fyrir í farangursrými á svörtum bíl.

Í meira en sólarhring leituðu lögregla og fleiri að Gaillard, meðal annars 50 hermenn sem flugu yfir héraðið á þyrlum, áður en hún kom fram. Hún virtist grunsamlega róleg yfir ráninu og sagði meðal annars að mannræningjarnir hefðu ákveðið að láta sig lausa án þess að krefjast greiðslu. Þó var hún margsaga um ákveðna þætti mannránsins. Svo fór að hún viðurkenndi ráðabruggið en tók sérstaklega fram að elskhuginn hefði ekki vitað um það. 

• Blogga um frétt