Erlent | AFP | 5.12.2017 | 14:05

Ásakanir ganga á víxl milli Írana og Sáda

Uppreisnarmaður skoða skemmdir í nágrenni forsetahallarinnar í Sanaa sem bandalagsríkin undir forystu Sádi-Araba gerðu árás á.

Stjórnvöld í Sádi-Arabíu vilja að Jemen losni við „skæruliða studda af Írönum“. Þetta kom fram í fyrstu yfirlýsingu þeirra eftir að uppreisnarmenn Húta í landinu réðu fyrrverandi forseta landsins af dögum í gær.

Frétt af mbl.is

Ástandið á eftir að versna

Ali Abdullah Saleh lét af völdum sem forseti árið 2011 í kjölfar arabíska vorsins. Við völdum tók Abedrabbo Mansour Hadi. Uppreisnarmenn úr hópi Húta, þjóðarbrots úr norðurhéruðum landsins, vildu Hadi frá og hertóku höfuðborgina Sanaa árið 2014. Um það leyti gengu þeir í bandalag með fyrrverandi forsetanum og hans stuðningsmönnum sem þeir höfðu áður verið svarnir óvinir. Upp úr þessu bandalagi slitnaði endanlega um helgina og uppreisnarmennirnir litu á Saleh sem svikara, er hann vildi koma á vopnahléi og semja við Sádi-Araba sem leiða hernaðarbandalag til stuðnings núverandi forseta. Saleh var því skotinn og drepinn.

„Ríkisstjórn Sádi-Arabíu ber þá von í brjósti að uppreisn almennings í Jemen gegn hryðjuverkum skæruliða Húta sem Íranar styðja, muni leiða til frelsun Jemen frá misnotkun, lífshættu og ólögmætrar eignaupptöku,“ sagði í yfirlýsingu frá Sádi-Aröbum.

Ekki var minnst á Saleh eða dauða hans í yfirlýsingunni.

Saleh sat á forsetastóli í 33 ár og þótti harðstjóri og spilltur. Hann naut á sínum tíma stuðnings Sádi-Araba eða allt þar til hann gekk í raðir uppreisnarmannanna árið 2014. Sviptingar hafa því verið stöðugar í valdataflinu í landinu. Fyrir utan uppreisnarmenn, stuðningsmenn Saleh, stuðningsmenn Hadi og hernaðarbandalagið hafa vígamenn Al-Qaeda og Ríkis íslams látið til sín taka í borgarastyrjöldinni.

Því hefur lengi verið haldið fram að Hútar njóti hernaðarlegs stuðnings Írana í stríðsrekstri sínum sem hófst af fullu afli er Sádi-Arabar hófu loftárásir í Jemen árið 2015. Stjórnvöld í Íran hafa ætíð neitað þessu. Í yfirlýsingu í dag sögðust þau þó enn neita afskiptum en tóku fram að Jemen myndi berjast gegn árásaraðilum og eru þar talin hafa átt við Sádi-Araba.