Mesti snjór sem fallið hefur í fjögur ár í Bretlandi olli miklu öngþveiti í dag. Ástandið var einnig slæmt víða í Evrópu og þurfti til dæmis að aflýsa um 300 flugferðum frá Þýskalandi. Þá strandaði ferja í höfninni við Calais í Frakklandi.
Hundruð flugfarþega urðu strandaglópar í Frankfurt í Þýskalandi og á Bretlandseyjum var ástandið litlu skárra.
Flugvöllurinn í Frankfurt er stærsti flugvöllur Þýskalands og heimavöllur Lufthansa. Um 1.260 lendingar og brottfarir voru áætaðar um völlinn í dag.
Þá var flugvöllurinn í Dusseldorf lokaður í fjóra tíma síðdegis vegna veðurs. Áætlanir lesta fóru einnig víða úr skorðum í Þýskalandi.
Í morgun var öllu flugi frá flugvellinum í Birmingham aflýst á meðan unnið var að því að moka snjó af flugbrautum. Einhverjum vélum sem áttu að lenda þar var beint annað. Um 30 þúsund manns fara daglega um flugvöllinn á þessum árstíma.
Þá var flugbraut á Luton-flugvelli lokuð í tvo tíma í morgun. Einn pirraður farþegi segir að ástandið á flugvellinum hafi verið eins og á vígvelli.
Verst var veðrið á Wales og í miðhluta Englands og þar var fólk hvatt til að vera ekki á ferð um götur nema af brýnni nauðsyn. Mörg umferðaróhöpp urðu á vegum á þessu svæði í dag.
Um 30 sentímetra jafnfallinn snjór var í Wales og í Birmingham var snjódýptin 10 sentímetrar.
Í London snjóaði einnig. Síðdegis voru samgöngur í borginni komnar að mestu í samt horf.