Náðaði barnanauðgara

John Magufuli, forseti Tansaníu, veifar til mannfjöldans á degi sjálfstæðis ...
John Magufuli, forseti Tansaníu, veifar til mannfjöldans á degi sjálfstæðis á laugardaginn. Í ræðu sinni greindi hann frá því að henni hefði náðað tvo barnanauðgara. AFP

Náðun forseta Tansaníu á tveimur nauðgurum hefur vakið hörð viðbrögð mannréttindasinna. Mennirnir tveir sem eru feðgar hlutu lífstíðarfangelsi fyrir að hafa nauðgað tíu stúlkum á aldrinum sex til átta ára. Dómur var kveðinn upp árið 2003 og þeir höfðu setið inni í 13 ár. BBC greinir frá.

„Þetta er hrikalegt en kemur mér ekki á óvart,“ segir Kate McAlpine einn stjórnandi félagasamtaka um réttindi barna. Hún segir réttindi barna vægast sagt ábótavant í landinu og náðun forsetans lýsir ríkjandi viðhorfi þar sem lítill sem enginn skilningur er á ofbeldi gagnvart börnum.

Hún segir jafnframt að náðunin tengist ræðu forsetans sem hann hélt í júní síðastliðnum þar sem hann bannaði óléttum stúlkum á barnsaldri að halda áfram skólagöngu sinni. „Hann er blindur þegar kemur að því horfast í augu við ofbeldi gagnvart börnum. Óléttar skólastúlkur eru óléttar því þær eru fórnarlömb ofbeldis,“ segir McAlpine. 

Magufuli greindi frá náðuninni í ræðu á degi sjálfstæðis Tansaníu síðastliðinn laugardag. Hann valdi hóp fanga sem hann náðaði og sagði þá jafnframt hafa bætt hegðun sína.

Þegar feðgarnir gengu frjálsir menn út úr fangelsinu fagnaði mannfjöldinn sem hafði safnast saman við fangelsið. Faðirinn Nguza Viking er þekktur söngvari í landinu undir listamannsnafninu Babu Seya og sonur hans heitir Johnson Nguza einnig þekktur sem Papii Kocha. 

Í Tansaníu er rík tilhneiging til að útkljá mál eins og nauðganir á börnum innan fjölskyldunnar eða að nauðgarar múti lögreglu og starfsfólki réttarvörslukerfisins til að komast undan dómi, að sögn McAlpine.  

mbl.is
Húsaviðgerðir - husco.is
https://www.husco.is/...
Sumarhús til sölu...
Fallegt sumarhús í Biskupstungum til sölu. 55 fm á einni hæð, viðhaldslaus klæ...
Heima er bezt tímarit
5. tbl. 2018 - Þjóðlegt og fróðlegt Tryggðu þér áskrift - www.heimaerbezt.net ...
Bækur um ættfræði, byggðasögu og ýmsan fróðleik til sölu
Til sölu nokkur grundavallarrit ættfræðinnar ásamt ritum um atvinnu- og byggðasö...