Norðurkóreskur hermaður sem flúði til Suður-Kóreu í ár var með mótefni gegn miltisbrandi í blóðinu. Er nú óttast að stjórnvöld í Norður-Kóreu ætli sér að nota sjúkdóminn sem vopn.
Suðurkóresk yfirvöld segja að hermaðurinn hafi annaðhvort komist í snertingu við miltisbrand eða verið bólusettur gegn honum.
Í frétt Sky-sjónvarpsstöðvarinnar um málið segir að stjórnvöld í Norður-Kóreu hafi um hríð verið grunuð um að framleiða efnavopn. Árið 2015 kynntu þau opinberlega rannsóknarstofnun í höfuðborginni Pyongyang sem þau sögðu framleiða skordýraeitur en sérfræðingar telja að þar séu efnavopn framleidd.
Þá er talið að þau ætli að hlaða odda langdrægra eldflauga með sporum (gróum) miltisbrands.
Í frétt CNN segir að yfirvöld í Suður-Kóreu hafi keypt töluvert af mótefni gegn miltisbrandi sem hermönnum verði gefið, komi til efnavopnaárásar úr norðri.