Fjölmiðlamaðurinn og rithöfundinn Michael Wolff er ekki þekktur fyrir að láta smávægis deilur eða ágreining koma í veg fyrir áætlanir sínar. Fjaðrafokið í kringum nýjustu bók hans, Fire and Fury: Inside the Trump White House, fellur því vel í kramið hjá honum, enda hefur eftirspurn eftir bókinni rokið upp úr öllu valdi.
Bókin, sem veitir innsýn inn í leik og störf Bandaríkjaforseta í Hvíta húsinu, átti upphaflega að koma út í næstu viku, en útgáfudegi hefur verið flýtt, bókin verður fáanleg á morgun.
Breska blaðið Guardian birti fyrsta textabrotið úr bókinni í gær þar sem haft er eftir Stephen Bannon, fyrrverandi ráðgjafa Donalds Trumps Bandaríkjaforseta, að hann telji að fundi Donalds Trumps yngri, sem hann átti með hópi Rússa í Trump-turninum á meðan kosningabaráttan fyrir forsetakosningarnar í Bandaríkjunum stóð yfir, megi lýsa sem landráði.
Forsetinn brást við eins og honum einum er lagið og sagði Bannon hafa misst vitið á sama tíma og hann missti starf sitt í Hvíta húsinu.
Frétt mbl.is: Trump segir Bannon hafa misst vitið
Trump hefur nú hótað Bannon, Wolff og útgáfufélaginu málsókn ef bókin kemur út, sem hann segir byggða á fölskum upplýsingum. Wolff hefur hins vegar greint frá því að bókin byggi á yfir 200 viðtölum við Trump og stafsmenn úr teymi hans sem tekin voru á 18 mánaða tímabili.
Frétt mbl.is: Reynir að stöðva útgáfu bókar um sig
Wolff, sem er 64 ára gamall, er þekktur fyrir að gefa ekkert eftir í samskiptum sínum í gegnum tíðina og er óhræddur við að snúa upp á þá sem búa yfir valdi.
Hann er því hæstánægður með viðbrögð forsetans við innihaldi bókarinnar og lét hann ánægju sína í ljós á Twitter:
„Gæti ekki verið ánægðari (augljóslega) með umfjöllunina á FIRE AND FURY,“ skrifaði hann meðal annars á Twitter-síðu sinni í dag.
Þar greindi hann einnig frá því að bókin verður fáanlega frá og með morgundeginum. „Takk, herra forseti.“