Lítill pandahúnn slær í gegn

Yuan Meng er fyrsti pandahúnninn sem fæðist í Frakklandi, en hann var sýndur almenningi í fyrsta skipti í Beauval-dýragarðinum þar í landi á laugardag.

Yuan Meng er fimm mánaða en það var Brigitte Macron, eiginkona Emmanuel Macron Frakklandsforseta, sem gaf honum nafn í desember síðastliðnum. Nafnið er að sjálfsögðu kínverskt en það þýðir: draumur sem rætist.

Húnninn er strax orðinn stjarna dýragarðsins. AFP

Yuang Meng er að sjálfsögðu orðinn stjarna dýragarðsins þrátt fyrir að hafa aðeins verið til sýnis í um sólarhring, en fólk ferðaðist langar vegalengdir til að berja húninn augum á frumsýningardaginn, að því er fram kemur í frétt BBC.

AFP

Dýralæknir garðsins sagði húninn hafa heimsótt hin nýju heimkynni síðastliðna tíu daga til að aðlagast þeim hægt og rólega, en almenningur fékk að sjá hann í fyrsta skipti í gær.

Litli húnninn ásamt móður sinni. AFP

Einn gestur dýragarðsins sagði í samtali við AFP-fréttastofuna að honum liði eins og hann væri að taka þátt í sögulegum atburði. „Við vöknuðum klukkan þrjú í morgun. Sonur minn vildi svo mikið sjá húninn.“

Mjög erfitt er fyrir pandabirni að fjölga sér þar sem kvenkyns pöndur eru aðeins frjóar í nokkra daga á ári.

AFP

• Blogga um frétt