Norska lögreglan telur sig nú vita hvernig hin 36 ára gamla Janne Jemtland, sem leitað hafði verið í tvær vikur, lést. Lík Jemtland fannst í gær á botni árinnar Glomma eftir margra klukkustunda leit lögreglu, en áður hafði eiginmaður hennar verið handtekinn í tengslum við málið. Sagði lögregla þá allt benda til þess að Jemtland hefði verið myrt.
Greindi lögreglan frá því á fundi með norskum fjölmiðlum í dag að hún hafi nú ákveðna tilgátu um atburðarásina og lát Jemtland.
Yfirheyrslum yfir eiginmanninum verður haldið áfram í dag, en hann var yfirheyrður fram eftir kvöldi í gær. Áður hefur komið fram að hann hafi vísað lögreglu á lík konu sinnar, en að hann neiti að hafa orðið henni að bana.
„Það hefur verið mikill framgangur í málinu síðustu daga,“ hefur norska ríkisútvarpið NRK eftir André Lillehovde van der Eyden, lögfræðingi lögreglunnar. Ekki verði þó greint frá dánarorsök Jemtland fyrr en að lokinni krufningu, sem verði í fyrsta lagi á morgun.
Lögregla óskar enn eftir vísbendingum frá almenningi, sérstaklega þeim sem eitthvað kunna að hafa orðið varir við í nágrenni árinnar.
Víðtæk leit hófst að Jemtland um tveimur sólarhringum eftir að hún hvarf og höfðu lögreglu borist yfir 200 ábendingar vegna hvarfsins. Björgunarsveitarfólk, leitarhundar og þyrlur ásamt lögreglu voru meðal þeirra sem tóku þátt í leitinni.