Bandaríska Youtube-stjarnan Chrissy Chambers vann einkamál sem hún höfðaði gegn fyrrverandi kærasta sínum. Hann hafði lekið hefndarklámi af henni á netið.
Chambers fagnaði niðurstöðunni með því að biðja kærustu sinnar, Bria Kam. Sú síðarnefnda sagði já og bætti við að Chambers væri „hugrakkasta og besta manneskja sem hún hefði hitt“.
Ekki verður greint frá nafni mannsins né upphæðinni sem hann þarf að greiða Chambers. Lögfræðingar segja að upphæðin sé talsverð. „Þetta er endirinn á erfiðum kafla í lífi okkar,“ sagði Chambers við Kam eftir að sigurinn var í höfn.
Hún sagði á sínum tíma að myndböndin hefðu verið tekin upp af henni þegar hún var undir áhrifum áfengis. „Þegar ég sá myndböndin fyrst, var eins og öll virðing mín fyki út um gluggann. Það var eins og ég hafi verið slegin í magann og ég missti andann. Einhverjir aðdáendur sendu mér skilaboð og sögðust ekki lengur geta horft á Youtube-myndböndin mín,“ segir Chambers.
Áður en Chambers kom út úr skápnum átti hún í níu mánaða sambandi við breskan mann, þegar hún var 18 ára gömul. Hún greindi frá því fyrir dómstólum að undir lokin á sambandinu hafi hann tekið upp kynlíf þeirra, án vitneskju eða samþykkis hennar.
Tveimur árum síðar kom maðurinn myndskeiðunum á klámsíðu en síðan hefur þeim verið deilt á meira en 35 slíkar síður.
Hefndarklám var gert ólöglegt í Bretlandi í apríl 2015 en myndböndin voru sett á netið fjórum árum fyrr. Chambers þurfti því að reiða sig á önnur lög í baráttunni og höfðaði af þeim sökum einkamál vegna tekjumissis og smánunar.