Norður-Kórea mun senda 22 íþróttamenn til keppni á vetrarólympíuleikunum sem hefjast í Pyeongchang í Suður-Kóreu 9. febrúar. Áður hafði verið greint frá því að Kóreuríkin senda sameiginlegt lið til leiks í íshokkíi kvenna.
Fundur var haldinn í Alþjóðaólympíunefndinni á sunnudag þar sem þátttaka Norður-Kóreu var rædd. Thomas Bach, forseti nefndarinnar, tilkynnti að löndin myndu ganga saman inn á völlinn á opnunarhátíð leikanna.
Bach sagði þetta mikilvægan atburð í löngu ferli og tilkynnti að auk þátttökunnar í íshokkíi myndi Norður-Kórea senda íþróttamenn til leiks á skautum og skíðum.
„Hinn sanni ólympíuandi snýst um virðingu og skilning,“ sagði Bach. „Ólympíuleikarnir í Pyeongchang eru vonandi upphafið að bjartari framtíð á Kóreuskaganum.“