Bandarísk stjórnvöld ætla á næstunni að beita sínum „hörðustu og mestu“ efnahagsþvingunum til þessa gagnvart Norður-Kóreu.
Þetta sagði Mike Pence, varaforseti Bandaríkjanna, eftir viðræður við Shinzo Abe, forsætisráðherra Japans, í Tókýó.
„Í dag tilkynni ég að Bandaríkin muni bráðum greina frá hörðustu og stórtækustu efnahagsþvingunum sínum gegn Norður-Kóreu,“ sagði Pence.
„Heimurinn skal fá að vita þetta: „Við munum halda áfram að auka þrýsting okkar þangað til Norður-Kórea tekur alvöruskref í átt að algjöru og óafturkræfu afvopnunarferli á kjarnavopnum.“
Donald Trump Bandaríkjaforseti hefur gagnrýnt stefnu fyrri ríkisstjórna Bandaríkjanna gagnvart Norður-Kóreu. Einnig hefur hann sannfært alþjóðasamfélagið um að herða refsiaðgerðir sínar gegn landinu.
Pence tjáði sig einnig um þátttöku Norður-Kóreu í Vetrarólympíuleikunum sem hefjast von bráðar í Suður-Kóreu.
Hann sagði að Bandaríkin ætli ekki ekki að leyfa Norður-Kóreu að „hertaka“ Vetrarólympíuleikana í Suður-Kóreu með áróðri.
„Við ætlum ekki að leyfa það að áróður frá Norður-Kóreu hertaki þau skilaboð og þær myndir sem koma frá Vetrarólympíuleikunum,“ sagði hann.
„Við ætlum ekki að leyfa Norður-Kóreu að fela á bak við fána Ólympíuleikanna þann sannleika að þeir hneppa sitt eigið fólk í ánauð og ógna öðrum ríkjum,“ sagði Pence.