Tveimur mönnum, sem mættu á setningarhátíð Vetrarólympíuleikanna í Pyeongchang í Suður-Kóreu í gervum Donalds Trump, Bandaríkjaforseta og Kims Jong-un, leiðtoga Norður-Kóreu, var vísað úr stúkunni af öryggisvörðum.
Þeir vöktu mikla athygli í áhorfendastúkunni þegar þeir mættu og voru ekki par sáttir við að vera vísað af vettvangi, enda hafi þeir verið þar í friðsamlegum tilgangi.
„Við vildum koma öllum á óvart og stuðla að heimsfriði og síðan er verið að fylgja okkur út af öryggisvörðum, sem ég tel mjög ósanngjarnt. Vilja ekki allir frið?“ hefur Reuters eftir tvífara Kim Jong-un.
Mikil áhersla var á nánari tengsl ríkjanna tveggja á Kóreuskaga við setningarathöfn leikanna og gengu íþróttamenn beggja ríkja saman inn á leikvanginn undir fána sameinaðs Kóreuskaga, auk þess sem Kim Yo Jong, systir Kim Jong-un, var viðstödd athöfnina.