New York ríki hefur höfðað mál á hendur Harvey Weinstein, bróður hans og fyrirtæki þeirra Weinstein and Co fyrir svívirðileg brot á borgaralegum réttindum og mannréttindum starfsfólks, sem og brot á viðskiptalögum. AFP-fréttastofan greinir frá.
Málshöfðunin kemur aðeins fjórum mánuðum eftir að ferli kvikmyndaframleiðandans lauk með skömm í kjölfar þess að yfir 100 konur ásökuðu hann um kynferðisofbeldi og #metoo-byltingin hófst.
Eric Schneiderman, ríkislögmaður New York ríkis, sagði málið verða tekið fyrir í hæstarétti, en í gögnum kæmu fram nýjar ásakanir um að fyrirtækið hefði ítrekað brotið á starfsfólki með siðlausum hætti.
Stjórn fyrirtækisins hefði brugðist skyldum sínum að vernda starfsfólk sitt og hefði ekki tekið í taumana vegna hegðunar Weinsteins þrátt fyrir ítrekaðar kvartanir.
„Fram kemur í stefnu okkar að Weinstein and Co hafi ítrekað brotið lög New York-ríkis með því að vernda starfsfólk sitt ekki fyrir kynferðislegri áreitni, kúgun og mismunun,“ segir Schneiderman.
Weinstein mun nú vera í meðferð við kynlífsfíkn en hann er til rannsóknar bæði hjá bresku og bandarísku lögreglunni vegna áskana um kynferðisofbeldi. Hann hefur þó ekki verið ákærður fyrir nein hinna meintu brota ennþá.