Erlent | mbl | 12.2.2018 | 11:52 | Uppfært 13:17

Handjárnin losuð af innflytjendaeftirlitinu

Innflytjendastefnu Donald Trumps Bandaríkjaforseta mótmælt. AFP

Viku eftir að Donald Trump var kjörinn forseti Bandaríkjanna hét hann því að stjórn sín myndi smala saman innflytjendum í glæpagengjum og fíkniefnaneytendum. Handtökum innflytjenda- og tollayfirvalda (ICE) hefur fjölgað um 40% frá því Trump tók við embætti að því er Washington Post greinir frá.

Segir blaðið starfsmenn ICE lofa forsetann fyrir að setja aukna áherslu á að tekið sé á málefnum ólöglegra innflytjenda og að stofnunin setji í forgang þau mál sem teljist til öryggisógnar, sem og mál ofbeldisfullra glæpamanna, rétt eins og hafi verið í tíð Barack Obama, fyrrverandi forseta.

Starfsmenn ICE hafa hins vegar nú aukið svigrúm til að ákveða hverjir eru settir í varðhald og segir Washington Post aukninguna vera mesta hjá innflytjendum með hreina sakaskrá. Þannig voru 37.734 innflytjendur sem ekki voru á sakaskrá handteknir í fyrra, sem er tvöfalt fleiri en árið á undan. Þess má þó geta að í þessum hópi eru einnig einstaklingar sem eiga mögulegar ákærur yfir höfði sér.

Innflytjandinn og aðgerðasinninn Ravi Ragbir var handtekinn í janúar. Alríkisdómari fyrirskipaði að hann yrði látinn laus aftur. AFP

Brottvísun fyrir að virða ekki stöðvunarskyldu

Gagnrýnendur segja ICE í síauknum mæli grípa þá innflytjendur sem náist til að mæta óraunhæfum væntingum forsetans um brottflutning ólöglegra innflytjenda.

Ekki hefur enn verið farið í smölun á vinnustaði, en svo gott sem í hverri viku eru einhverjir handteknir.

Kona sem bjó í Virginíu ásamt fjölskyldu sinni var send til baka til El Salvador í júní, eftir að hafa búið í 11 ár í Bandaríkjunum. Ástæðan var sú að hún virti ekki stöðvunarskyldu. Þá var karlmaður í Connecticut, sem á bandaríska konu og með henni börn, sendur til baka til Gvatemala í síðustu viku. Maðurinn var með hreina sakaskrá.

Innflytjandinn og aðgerðasinninn Ravi Ragbir var síðan hnepptur í varðhald í síðasta mánuði og sætti fangelsun hans mikilli gagnrýni af hálfu alríkisdómara.

„Það á ekki að gerast – og hefur ekki áður gerst – að þeir sem hafa búið í þessu landi árum saman án þess að neitt komi upp, séu látnir sæta meðferð sem við eignum venjulega stjórnvöldum í ríkjum sem við tengjum óréttlæti,“ sagði í úrskurði alríkisdómarans Katherine B. Forrest er hún fyrirskipaði að Ragbir yrði látinn laus.

Landamæravörður fylgist hér með landamærum Bandaríkjanna og Mexíkó. AFP

Framkvæma æ oftar handtökur í dómsölum

Þeir sem eiga yfir höfði sér að vera vísað úr landi er gert að tilkynna sig reglulega hjá innflytjendaeftirlitinu. Það sem áður var bara rútínuheimsókn, svo framarlega sem viðkomandi hafði ekki brotið lög, getur hins vegar nú endaði í handjárnum.

Washington Post segir stjórn Trump hafa veitt ICE-starfsmönnum á vettvangi aukið svigrúm til að ákveða hverja þeir handtaka og hverjar ástæður handtökunnar eru.

Hafa stuðningsmenn forsetans hjá ICE líkt þessu við að taka „handjárnin af“ og segja starfsandann hjá stofnuninni hafa batnað við það að starfsmenn hafi nú aftur öðlast vald til að handtaka hvern þann sem þeir gruna um að vera ólöglega í landinu.

Þá gerist það nú æ oftar að starfsmenn ICE framkvæmi handtökur í dómsölum og þá víla starfsmenn ekki lengur fyrir sér að handtaka fleiri en einn, er þeir berja að dyrum í leit að grunuðum einstaklingi.

„Hvað eigum við að gera,“ segir Matthew Albence, yfirmaður löggæsludeildar stofnunarinnar, og segir ICE einfaldlega vera að koma lögum á á ný.