Skildi bróður sinn eftir í fangelsi í sinn stað

Yfirvöld í Perú hafa nú handtekið mann á ný, rúmu ári eftir að hann flúði úr fangelsi með því að láta tvíburabróðir sinn dvelja í fangelsinu í sinn stað.

Fanginn, Alexander Delgado hafði hlotið 16 ára fangelsisdóm fyrir barnaníð og rán og sat hann í fangelsi norður af höfuðborginni Lima.

Þegar að tvíburabróðir hans Giancarlo, heimsótti hann í fangelsið í janúar á síðasta ári, þá byrlaði hann bróður sínum ólyfjan, klæddi sig síðan í föt hans og gekk út.

Eftir að búið var að taka fingraförin af Giancarlo var staðfest að saga hans var rétt.

Á mánudag, 13 mánuðum eftir flóttann, var Alexander Delgado síðan handtekinn í hafnarborginni Callao. Þá hafði innanríkisráðuneyti Perú boðið fram verðlaun fyrir vísbendingu sem leitt gæti til handtöku hans.

BBC segir gert ráð fyrir að Alexander verði nú fluttur í annað fangelsi með hámarks öryggisgæslu.

Á meðan að Alexander lék lausum hala var tvíburabróðirinn hins vegar handtekinn og rannsakaður vegna gruns um að hann væri að aðstoða bróður sinn. Hann var hins vegar ekki ákærður og hefur verið látinn laus.

Alexander sagði við fjölmiðla í Perú eftir handtöku sína að hann hefði gripið til þessa ráðs til að flýja, „af því að ég þráði svo heitt að hitta móður mína“.

• Blogga um frétt