Sprengjum sýrlenska hersins hefur verið varpað á sex sjúkrahús á síðustu tveimur dögum í austurhluta Ghouta-héraðs þar sem sýrlenskir uppreisnarmenn hafast við.
Þrjú sjúkrahúsanna hafa verið óstarfhæf vegna sprenginganna og þó nokkrir hafa látist, að sögn Sameinuðu þjóðanna.
„Ég er fullur viðbjóðs og í öngum mínum vegna fregna af hryllilegum árásum á sex sjúkrahús í austurhluta Ghouta undanfarna tvo sólarhringa,“ sagði Panos Moumtzis, starfsmaður mannúðarmála í Sýrlandi hjá Sameinuðu þjóðunum.
Fregnir hafa einnig borist af því að fleiri sjúkrahús hafi orðið fyrir árás og þau orðið óstarfhæf í framhaldinu.