Að minnsta kosti tíu hafa látist í fimbulkulda í Evrópu undanfarna þrjá daga en kuldakastið hefur fengið viðurnefnið „skepnan úr austri“. Ástæðan er kaldur vindur sem berst vestur yfir álfuna frá Síberíu.
Óttast er að kuldinn muni taka frekari toll og eru heimilislausir og eldra fólk í mestri hættu. Víða hefur þurft að fella niður kennslu og eins hafa samgöngur gengið úr skorðum vegna ófærðar.
Á sama tíma er óvenjuhlýtt á norðurslóðum líkt og Íslendingar hafa orðið varir við undanfarna daga.
Aftur á móti bítur kuldinn Rómarbúa en þar snjóaði í fyrsta skipti í sex ár í gær og mældist 4 stiga frost þar. Er jafnvel búist við því að aflýsa þurfi leikjum í ítölsku deildinni annað kvöld útaf kuldanum. Einna kaldast í Evrópu var í DolinaCampoluzzo á Norður-Ítalíu en þar mældist frostið 40 gráður. Veðurstöðin er í 1.768 metra hæð.
Í Póllandi hafa að minnsta kosti fjórir látist í kuldakastinu frá því á laugardag en þar mældist 12 stiga frost í nótt. Í Litháen var 20 stiga frost í nótt en þar hafa þrír látist. Spáð er 10 stiga frosti í Frakklandi í vikunni. Þar eru þrír látnir.
Á sunnudag lést 35 ára gamall heimilislaus maður í borginni Valence í suðausturhluta Frakklands og á föstudag fannst 62 ára gamall maður látinn í kofa sínum í skóglendi fyrir utan París. Sá þriðji fannst látinn á víðavangi í Gresy-sur-Aix síðdegis í gær.
Í hluta Evrópu hafa stjórnvöld fyrirskipað sveitastjórnum að koma upp neyðarskýlum fyrir heimilislausa og í Brussel í Belgíu hafa heimilislausir verið þvingaðir til þess að fara í slík skýli. Að öðrum kosti verði þeir settir í varðhald.
Bæjarstjórinn íEtterbeek,VincentDeWolf, segir að það sé á ábyrgð yfirvalda að koma í veg fyrir að íbúarnir deyi úr kulda en þar er spáð 15 stiga frosti annað kvöld.
Í Berlín eru nánast öll neyðarskýli fullnýtt en frostið hefur farið niður í 20 gráður víða í Þýskalandi.
Á stöðum eins og Nice í Suður-Frakklandi hefur snjóað og við strönd Adríahafs í Króatíu hefur þurft að loka þjóðvegum vegna snjókomu.