„Skepnan úr austri,“ líkt og kuldakastið sem gengið hefur yfir Evrópu síðustu rúmu viku hefur verið kallað, hefur orðið yfir 60 manns að bana í álfunni. Viðurnefnið má rekja til kaldra vinda sem berast vestur yfir álfuna frá Síberíu.
Frétt mbl.is: Skepnan úr austri bítur fast
Athvörf hafa verið opnuð víða til að tryggja heimilislausu fólki samastað. Mesta mannfallið er í Póllandi þar sem 23 hafa látið lífið. Flestir hinna látnu eru heimilislausir og eru dauðsföllin rakin til kuldans sem og áfengisneyslu þar sem fólk drekkur í þeim tilgangi að ná upp hita, að sögn fréttaritara BBC í Varsjá. Þar hefur mælst 15 gráðu frost síðustu nætur.
Sjö hafa látið lífið í Slóvakíu, sex í Tékklandi, fimm í Litháen og Frakklandi og að minnsta kosti þrír á Spáni. Dauðsföll hafa einnig orðið á Ítalíu, Rúmeníu, Serbíu, Slóveníu, Bretlandi, Hollandi, Svíþjóð og Noregi.
Samgöngutruflanir og rafmagnsleysi hafa einnig verið fylgifiskur kuldakastsins sem hefur teygt sig allt frá Miðjarðarhafi til Bretlandseyja þar sem stormurinn Emma gekk á land í gær. Flugumferð í Dublin og Cork hefur tafist verulega frá því í gær og gætir tafanna enn þar sem flugum hefur verið frestað þar til á morgun, laugardag. Þá var herinn einnig kallaður út til að aðstoða þá sem lentu í vandræðum vegna stormsins.
Frétt mbl.is: 10 látnir af völdum stormsins Emmu
Það horfir til betri vegar í mið- og suðurhluta Evrópu næstu daga, en það verður áfram kalt í veðri í norðausturhluta álfunnar.