Leiðtogar Rússlands, Kína, Japans og Suður-Kóreu hafa allir fagnað fyrirhuguðum fundi Donalds Trump Bandaríkjaforseta og Kims Jong-un, leiðtoga Norður-Kóreu.
Sergei Lavrov, utanríkisráðherra Rússlands, segir að fundurinn sé „skref í rétta átt“.
„Við vonum að þessi fundur verið að veruleika,“ sagði Lavrov. „Það er vissulega þörf á því að bæta ástandið á Kóreuskaganum.“
Kínverjar hafa einnig lýst yfir ánægju sinni með fundinn og hvetja leiðtogana tvo til að sýna „pólitískt hugrekki“ við fækkun kjarnorkuvopna á Kóreuskaganum.
„Við fögnum þessum jákvæðu skilaboðum frá Bandaríkjunum og Norður-Kóreu um að eiga náið samtal,“ sagði Geng Shugang, talsmaður kínverska utanríkisráðuneytisins.
Hann bætti við að kjarnorkumál á Kóreuskaganum þokist nú í rétta átt.
„Við vonum að allir aðilar geti sýnt pólitískt hugrekki með því að taka réttar pólitískar ákvarðanir.“
Moon Jae-in, forseti Suður-Kóreu, gleðst einnig yfir fyrirhuguðum fundi. „Fundurinn í maí verður skráður í sögubækurnar sem mikil tímamót varðandi friðarhorfur á Kóreuskaganum,“ sagði hann.
Shinzo Abe, forsætisráðherra Japans, fagnaði fundinum einnig. „Ég er mjög ánægður með breytt viðhorf hjá Norður-Kóreu um að hefja viðræður um forsendur afvopnunar,“ sagði hann og bætti við að hann ætlaði að heimsækja Bandaríkin í apríl til að ræða við Trump.