Rússar sökuðu Breta í dag um að reyna að grafa undan trausti í garð þeirra áður en heimsmeistaramótið í knattspyrnu fer fram í Rússlandi í sumar. Theresa May, forsætisráðherra Bretlands, sagði fyrr í dag að það væri mjög líklegt að Rússar hefðu eitrað fyrir fyrrverandi njósnara sínum á breskri grundu.
„Við höfum oft varað því því að áður en mótið hefst í sumar munu vestrænir fjölmiðlar hefja herferð gegn Rússlandi og Rússum og reyna að grafa undan trausti í garð okkar,“ kom fram á Facebook-síðu utanríkisráðuneytis Rússlands.
„Eins og við var að búast hafa Englendingar verið fremstir í flokki í þessum áróðri vegna þess að þeir geta ekki sætt sig við að okkar land var valið en ekki þeirra til að halda mótið,“ kom enn fremur fram hjá utanríkisráðuneytinu.
„Þetta er skrípaleikur í breska þinginu,“ sagði Maria Zakharova, talsmaður rússneska utanríkisráðherrans.
Feðginin, Sergei og Julia Skripal eru enn á gjörgæslu en þau fundust meðvitundarlaus á bekk 4. mars. Ástand þeirra er stöðugt en alvarlegt. Lögreglumaður, Nick Bailey, sem var meðal þeirra fyrstu sem kom á vettvang þegar feðginin fundust er að ná heilsu. Hann er kominn til meðvitundar og farinn að geta tjáð sig.