Lögfræðingur klámmyndaleikkonunnar Stormy Daniels segir að henni hafi verið hótað líkamsmeiðingum. Lögfræðingur Donalds Trump Bandaríkjaforseta borgaði henni því sem samsvarar 13 milljónum íslenskra króna til að hún myndi ekki tala um meint samband hennar og forsetans.
Daniels mun mæta í réttarsal 12. júlí þar sem mál hennar gegn Trump verður tekið fyrir. Hún höfðaði mál gegn forsetanum fyrr í mánuðinum vegna þess hún telur að þagnarsamkomulag þeirra sé ómerkt. Daniels hefur boðist til að endurgreiða það sem Michael Cohen, lögmaður Trumps, greiddi henni til að hún geti talað opinskátt um sambandið við forsetann.
Lögfræðingur Daniels, Michael Avenatti, vildi ekki segja til um hvort hótanirnir sem Daniels hefðu borist kæmu frá forsetanum. Avenatti ræddi málið í morgunþætti á MSNBC sjónvarpsstöðinni. Hann sagðist ekki geta sagt til um hvort forsetinn stæði á bak við hótanirnir, né hversu alvarlegar þær væru.
„Ég get ekki tjáð mig nánar um málið,“ sagði Avenatti sem gat þó staðfest að Daniels hefði verið hótað.
Lögmaður Trumps útbjó samkomulag þar sem því er heitið að hún fái greidda 130 þúsund Bandaríkjdali frá fyrirtækinu Essential Consultants LLC ef hún þegi um sambandið við Trump. Notaði hann dulnefnin Peggy Peterson og David Dennison á samkomulagið og áttu þau Clifford og Trump að skrifa undir ásamt fulltrúa Essential Consultants.
Nokkrum dögum fyrir forsetakosningarnar í nóvember 2016 skrifaði Clifford undir og eins Cohen fyrir hönd Essential Consultants. En Trump skrifaði aftur á móti ekki undir og það þýðir að samkomulagið er ekki í gildi að sögn lögmanns hennar.