Ameenah Gurib-Fakim, forseti Máritíus, sagði af sér embætti í dag vegna hneykslismála. Einungis nokkrir dagar eru síðan Gurib-Fakim neitaði að segja af sér vegna sömu mála.
Gurib-Fakim, sem er fyrsti kvenforseti Máritíus og einnig Afríkuríkis, er sökuð um að hafa nýtt sér greiðslukort frá góðgerðarsamtökum til eigin nota.
Lögfræðingur forsetans, Yousouf Mohamed, sagði að ákvörðun hennar um að stíga til hliðar væri tekin í þágu þjóðarinnar og tæki gildi 23. mars.
Kortið sem Gurib-Fakim notaði er skráð á frjálsu félagasamtökin Planet Earth Institute og á Gurib-Fakim kort frá sama banka sem hún taldi sig vera að nota. 27.000 dollarar, eða sem nemur tæpum 2,7 milljónum króna, voru teknar af kortinu. Í tilkynningu frá stofnunni í London kemur fram að fjárhæðin hafi verið greidd til systurstofnunarinnar í Máritíus.
Forsetinn fékk kortið til að greiða fyrir ferðakostnað í þeim tilgangi að kynna vísinda- og tæknistörf í Afríku, en doktorsnám við stofnunina er kennt við Gurib-Fakim, sem er sjálf vísindamaður.