Eldflaugar norðurkóreska hersins geta nú náð til Evrópu með kjarnaodda að því er þýska blaðið Bild am Sonntag hefur eftir heimildamanni í þýsku leyniþjónustunni. Sagði heimildamaðurinn að Ole Diehl, aðstoðarforstjóri þýsku leyniþjónustunnar BND, hefði greint þingmönnum frá því á lokuðum fundi að þetta væri orðið „öruggt“.
Diehl á þó einnig að hafa sagt stofnunina telja þær viðræður sem átt hafa sér stað milli Norður- og Suður-Kóreu eftir Vetrarólympíuleikana í síðasta mánuði vera jákvætt merki.
Leyniþjónustan hefur að sögn Reuters ekki tjáð sig um fréttina.
Háttsettur sendifulltrúi Norður-Kóreu sem sér um málefni Norður-Ameríku þar í landi hélt í dag til Finnlands til að funda með Bandaríkjamönnum og Suður-Kóreu.
Spenna hefur farið vaxandi á Kóreuskaganum undanfarin misseri, enda hefur Norður-Kórea ekki farið dult með þá áætlun sína að kjarnavopnavæðast. Nokkur þýða hefur hins vegar verið í samskiptum ríkjanna frá Vetrarólympíuleikunum.