Rússar hafa safnað birgðum af taugagasi, eins og því sem notað var í árásinni gegn Sergei Skripal og dóttur hans Yuliu, síðasta áratuginn. Þessu heldur Borin Johnson, utanríkisráðherra Bretlands, fram.
Vladimir Chizhov, sendiherra Rússlands hjá Evrópusambandinu, hefur gefið í skyn að taugagasið hafi mögulega verið búið til í breskri tilraunastofu. Johnson segir það algjörlega fráleitt.
„Við höfum sannanir sem sýna að Rússar hafa verið að búa til og safna birgðum af novichok-eiturefnum,“ sagði Johnson í samtali við BBC.
Hann bætti því við að viðbrögð Rússa síðustu daga væru ekki „viðbrögð þess saklausa“.