Erlent | AFP | 26.3.2018 | 11:35 | Uppfært 22:20

Tyrkir stefna enn á aðild að ESB

Recep Tayyip Erdogan, forseti Tyrklands, fyrr í mánuðinum. AFP

Recep Tayyip Erdogan, forseti Tyrklands, segir að Tyrkir stefni enn að því að verða hluti af Evrópusambandinu.

„Við stefnum enn á aðild að Evrópusambandinu,“ sagði Erdogan á flugvellinum í Istanbúl.

Síðar í dag mun hann funda í Búlgaríu með Donald Tusk, forseta leiðtogaráðs ESB, Jean-Claude Juncker, forseta framkvæmdastjórnar Evrópusambandsins, um málefni Tyrklands.

Erdogan bætti við að stjórnvöld í Ankara, höfuðborg Tyrklands, muni ekki leyfa það að komið verði í veg fyrir rétt þjóðarinnar til aðildar að ESB.

Á síðasta ári sagði Erdogan að Tyrkir þyrftu ekki á Evrópusambandinu að halda en þeir myndu þó ekki ákveða einhliða að slíta aðildarviðræðum. Viðræðurnar hafa staðið yfir í 13 ár.