Þúsundir komu saman í síberísku kolanámuborginni Kemerovo í dag til að mótmæla aðgerðaleysi rússneskra stjórnvalda vegna eldsvoðans í verslunar- og afþreyingarmiðstöð í borginni á sunnudag.
64 létust í eldsvoðanum, þar af 41 barn. Talið er að um 70 manns sé enn saknað og leit stendur enn yfir í rústunum. Foreldrar 11 ungmenna hafa birt myndir af börnum sínum í grennd við rústir verslunarmiðstöðvarinnar í von um að þau finnist á lífi.
Valdimír Pútín, forseti Rússlands, kom til Kemerovo fyrr í dag og segir hann orsök eldsvoðans mega rekja til „glæpsamlegrar vanrækslu“. Mótmælendur krefjast afsagnar forsetans. Fjöldi mótmælenda segist ekki treysta yfirvöldum.
Mótmælin höfðu staðið yfir í um sjö klukkutíma þegar ríkisstjórinn Sergei Tsivilev kraup á kné fyrir framan fólkið og baðst fyrirgefningar. Fram kemur í frétt BBC að mótmælendur tóku afsökunarbeiðninni vel og klöppuðu fyrir Tsivilev.
Skipuð hefur verið sérstök rannsóknarnefnd vegna eldsvoðans og segir yfirmaður nefndarinnar að alvarleg brot á brunavarnareglum hafi átt sér stað og að bruninn sé rannsakaður sem glæpur. Fimm manns hafa verið handteknir vegna málsins, þeirra á meðal öryggisvörður sem grunaður er um að hafa lokað neyðarútgöngum.