Borgarstjóri Kemerovo í Rússlandi hefur sagt af sér embætti vegna viðbragða hans við eldsvoðanum í verslunarmiðstöð í borginni fyrir viku síðan sem varð 64 að bana í vikunni. Flestir hinna látnu voru börn.
BBC greinir frá því að Aman Tuleyev, borgarstjóri Kemerovo, telji að það hafi verið rétt ákvörðun að stíga til hliðar í kjölfar harmleiksins sem eldsvoðinn var og afleiðinga hans. Tilkynning um uppsögn hans birtist á vefsíðu borgarstjórnar Kemerovo.
Tuleyev hefur verið borgarstjóri í Kemerovo í rúmlega tuttugu ár en var harðlega gagnrýndur fyrir að fara ekki á slysstað fyrr en nokkrum dögum eftir að eldsvoðinn átti sér stað. Þá var hann einnig gagnrýndur fyrir að heimsækja ekki fjölskyldur þeirra sem létust í eldsvoðanum.
Þúsundir komu saman í Kemerovo í vikunni til að mótmæla aðgerðaleysi rússneskra stjórnvalda vegna eldsvoðans sem hefur vakinn mikinn óhug í landinu og víðar. Valdimír Pútín, forseti Rússlands, heimsótti borgina á þriðjudag og segir hann orsök eldsvoðans mega rekja til „glæpsamlegrar vanrækslu“. Hann sá ekki ástæðu til að víkja Tuleyev úr starfi.
Frétt mbl.is: Krefjast afsagnar Pútíns
Sérstök rannsóknarnefnd hefur verið skipuð vegna eldsvoðans og segir yfirmaður nefndarinnar að alvarleg brot á brunavarnareglum hafi átt sér stað og að bruninn sé rannsakaður sem glæpur.