Winnie Mandela látin

Winnie Madikizela Mandela, fyrrverandi eiginkona Nelsons Mandela, er látin. Hún var 81 árs að aldri.

Hún lést á Netcare Milpark-sjúkrahúsinu í Jóhannesarborg í Suður-Afríku eftir langvinn veikindi að því er kemur fram í frétt AFP um andlát Winnie.

Winnie og Nelson Mandela voru gift í 38 ár og lék hún stórt hlutverk í baráttunni gegn aðskilnaðarstefnunni í Suður-Afríku. Stærstan hluta hjónabandsins voru þau í sundur, eða þau 27 ár sem fyrrverandi eignmaður hennar var í fangelsi. 

Nelson og Winnie Mandela árið 1990 þegar hann losnaði úr fangelsi eftir 27 ár. AFP

En mannorð Winnie var þó ekki óflekkað í gegnum tíðina. Hún hefur verið fundin sek um fjársvik og meðsek um pyntingar og morð. Árið 1991 var hún sakfelld fyrir aðild að mannráni fjögurra ungmenna og morðs á einu þeirra, hinum 14 ára Stompie Moeketsi, af höndum lífvarðasveitar hennar. 

Leiðir Nelson og Winnie lágu í sundur árið 1992 og skildu þau formlega fjórum árum seinna eftir löfræðideilu sem leiddi ljós að hún hafði haldið við ungan lífvörð.

Fréttin hefur verið uppfærð

• Blogga um frétt