Erlent | mbl | 6.4.2018 | 7:17

Lögreglan getur beitt valdi vegna búrkubanns

Konur með niqab-andlitsblæjur fyrir andliti sínum. Slíkt verður brátt bannað í Danmörku. AFP

Samkomulag hefur náðst meðal meirihluta þingmanna á danska þinginu um að setja lög sem banna konum að klæðast búrkum eða niqab-andlitsslæðum. Verði lögin að veruleika, sem útlit er nú fyrir, gæti lögreglan beitt valdi gegn konum sem klæðast þessum fatnaði á almannafæri.

Þessu fagnar Martin Henriksen, talsmaður Þjóðarflokksins í innflytjendamálum en flokkur hans hefur frá árinu 2009 barist fyrir banni sem þessu.

„Ef frumvarpið verður að veruleika, og lögreglan sér einhvern í til dæmis búrku eða með niqab-andlitsblæju, þá verður hún að stöðva [viðkomandi],“ segir Henriksen í samtali við danska ríkisútvarpið. „Það getur gerst þegar lögreglan biður einhvern um að taka blæjuna af eða fara úr búrkunni og þá er hægt að beita sektum.“

Fréttamaður danska ríkisútvarpsins spurði Henriksen hvernig framfylgja ætti banninu, hvort að farið yrði í aðgerðir vegna þess.

„Ég sé ekki fyrir mér að farið verði í aðgerðir á ákveðnum svæðum. Ef frumvarpið verður samþykkt og lögreglan sér konur með niqab, sem þá verður orðið ólöglegt, þá á lögreglan að stöðva það og sekta. Rétt eins og með önnur lögbrot.“

Fréttamaður danska ríkisútvarpsins spurði Henriksen jafnframt hversu langt lögreglan ætti að ganga til að stöðva „glæpinn“. „Auðvitað á hún að biðja viðkomandi að fara úr hinum ólöglega klæðnaði. Ef viðkomandi vill ekki gera það þá er hann að óhlýðnast valdstjórninni. Auðvitað á lögreglan að leggja sig fram við að tala við viðkomandi áður en hún beitir valdi.“

- En getur lögreglan beitt valdi?

„Auðvitað má hún það. Það má gera ráð fyrir að einhverjir óhlýðnist og neiti að fara úr þessum klæðnaði. Þá getur verið að lögreglan verði að færa viðkomandi inn í lögreglubílinn og á næstu lögreglustöð þar sem hann getur setið og hugsað sinn gang þar til hann fer úr klæðnaðinum,“ svaraði Henriksen fréttamanni danska ríkisútvarpsins.

Þingmenn Jafnaðarmannaflokksins kröfðust þess að sett yrðu ákvæði í frumvarpið til að styrkja félagslega stöðu kvenna. Að öðrum kosti myndu þeir ekki fallast á það. Þannig verði að taka tillit til félagslegrar stöðu kvennanna sem klæðast búrkum eða bera niqab áður en banninu verði framfylgt.