Eldri, hvítir kjósendur sem höfðu hlotið framhaldsmenntun hjálpuðu Donald Trump við að ná kjöri í bandarísku forsetakosningunum 2016. Nú virðist þessi kjósendahópur hins vegar hlynntari demókrötum, en samkvæmt nýrri skoðanakönnun Reuters/Ipsos er fjöldinn slíkur að það getur breytt valdahlutföllum í þinginu í næstu kosningum.
Samkvæmt könnuninni, sem gerð var á fyrstu þremur mánuðum þessa árs, þá njóta demókratar nú 2% meiri stuðnings meðal hvítra, háskólamenntaðra kjósenda sem eru komnir yfir sextugt. Á sama tíma árið 2016 nutu repúblikanar á þingi 10% meiri stuðnings hjá þessum kjósendum
Segir Reuters þetta vera mikil sinnaskipti hjá þessum hópi, 12% viðsnúningurinn sé einn sá mesti sem mælst hafi hjá Reuters/Ipsos sl. tvö ár. Haldi áfram sem horfi, þá muni repúblikanar eiga erfitt með að viðhalda meirihluta sínum í fulltrúadeild Bandaríkjaþings og mögulega í öldungadeildinni líka er þingkosningar fara fram í nóvember. Það geti mögulega gert forsetanum erfiðara um vik að koma stefnumálum sínum í gegn.
„Hinn harði kjarni kjósenda Repúblikanaflokksins er hvítur, eldra hvítt fólk og ef þeir eru að tapa stuðningi þar þá er er flóðbylgja á leiðinni,“ segir stjórnmálafræðingurinn Larry Sabato við háskólanna í Virginíu. „Haldi þetta áfram fram í nóvember, þá eru þeir búnir að vera.“
Ronna McDaniel, formaður landsnefndar Repúblikanaflokksins, segir öflugt fjáröflunarstarf framundan og að flokkurinn muni há öfluga kosningabaráttu í óvissuríkjum. „Við tökum ekki eitt einasta atkvæði sem gefið,“ segir hún.
John Camm hefur verið repúblikani frá því á tímum Nixon stjórnarinnar. Þessi 63 ára Tuscon-búi segist hins vegar líklega munu kjósa Demókrataflokkinn í haust. Hann sé að segja skilið við flokkinn vegna stefnu Repúblikanaflokksins varðandi heilbrigðistryggingar og nýlegar breytingar á tekjuskattskerfinu. Þá er hann líka hlynntur hertri byssulöggjöf, sem flokkurinn hafnaði nýlega.
„Ég er repúblikani á miðjunni og flokkurinn minn hefur yfirgefið þann stað,“ segir Camm. „Þannig að látið mig bara fá demókrata á miðjunni.“
Camm er ekki einn um áhyggjur sínar af heilbrigðismálum, en eldri kjósenda sem völdu heilbrigðismál sem áhyggjuefni í könnun Reuters/Ipsos hefur tæplega þrefaldast á sl. þremur árum. Þá höfðu 8% áhyggjur af málaflokknum, en í dag eru það 21%.
Þar sem eldra fólk er líklegra til að mæta á kjörstað en þeir sem yngri eru, þá kunna áhrifin á fylgi flokkanna að vera mun meiri en prósentutalan segir til um. Eldri borgarar eru þá líka fjölmennir í mörgum kjördeildum þar sem lítill munur er á milli flokkanna samkvæmt Reuters, en Demókrataflokkurinn þarf í dag að fá 24 þingsætum í viðbótar til að ná meirihluta í fulltrúadeildinni.
Eldri, hvítir Bandaríkjamenn eru, þegar menntunarstig er ekki tekið inn í myndina, enn líklegri til að kjósa Repúblikanaflokkinn frekar en Demókrataflokkinn. Fylgi við flokkinn hjá þessum aldurshópi í heild fer þó minnkandi og hefur dregist saman um 5% frá fyrri hluta árs 2018.