Barbara Bush, fyrrverandi forsetafrú Bandaríkjanna, er látin, 92 ára að aldri.
Barbara er eina konan sem hefur upplifað að eiga eiginmann og son sem forseta Bandaríkjanna en hún var eiginkona George H.W. Bush og móðir George W. Bush, fyrrverandi Bandaríkjaforseta. Í tilkynningu frá skrifstofu forsetans fyrrverandi er Barböru lýst sem ótrauðum málsvara fyrir læsi. Sem forsetafrú beindi hún kröftum sínum að því að efla læsi og lestur.
Heilsu hennar fór hrakandi og ákvað hún að þiggja ekki frekari læknismeðferð um helgina, en hún hefur ítrekað þurft að leggjast inn á spítala vegna veikinda sinna.
Frétt mbl.is: Heilsu Barböru Bush hrakar
Barbara Bush var forsetafrú Bandaríkjanna frá árinu 1989 til 1993 og var hún þekkt fyrir hispursleysi og hnyttni í máli sínu.