Taugaeitrið sem beitt var gegn Sergei og Júlíu Skripal var í vökvaformi. Þetta er niðurstaða rannsóknar Umhverfisstofnunar Bretlands. Telur stofnunin að eitrinu hafi verið byrlað á heimili Skripal í bænum Salisbury og að aðeins lítið magn eitursins novichok hafi þurft til.
Stofnunin hefur nú hafið mikla upphreinsun í bænum Salisbury en ákveðin svæði hafa verið girt af eftir árásina sem gerð varð þann 4. mars. Þá fundust feðginin meðvitundarlaus á bekk fyrir utan verslunarmiðstöð. Þau höfðu áður farið á veitingastað og bar og hafa þeir staðir m.a. verið lokaðir síðan af öryggisástæðum.
Níu staðir, þar sem grunur um að eitrið væri að finna, voru rannsakaðir. Að þeim beinist nú upphreinsistarfið. Meðal svæða sem voru innsigluð á meðan rannsókn fór fram voru leiði eiginkonu Skripals og sonar hans í kirkjugarðinum í Salisbury
Eitrið fannst m.a. á hurðahúnum á heimili Skipals, að því er fram kemur í frétt Sky-sjónvarpsstöðvarinnar um málið. Áður hafði grunur leikið á því að efnið hefði verið leitt inn í bíl feðginanna í gegnum miðstöðina.
Um 190 sérfræðingar úr hernum munu taka þátt í upphreinsistarfinu og er talið að það muni taka marga mánuði.