Þrettán ára drengur, ásamt áhugamanni um fornleifar, varð að liði við að finna einstakan fjársjóð sem talinn er tengjast hinum goðsagnakennda danska konungi Haraldi blátönn sem var uppi á tíundu öld. Fjársjóðurinn, sem samanstendur af smápeningum og skartgripum, fannst á þýsku eyjunni Rügen. Smápeningarnir eru 500-600 talsins og er talið að um 100 þeirra séu frá þeim tíma sem Haraldur ríkti.
Smápeningarnir eru úr silfri og á þeim er kross en Haraldur var sá sem kynnti þegna sína fyrir kristni.
Þetta er í fyrsta sinn sem smámynt frá tíma Haraldar finnst utan Danmerkur.
Í frétt The Local um málið segir að áhugamaður um fornleifar, René Schön, og hinn þrettán ára gamli Luca Malaschnitschenko hafi í janúar notað málmleitartæki í leit að fjársjóði í Rügen. Ekki gátu þeir gert sér í hugarlund að fundur þeirra á nokkrum smápeningum myndi hrinda af stað umfangsmikilli fornleifarannsókn á svæðinu og að í henni fyndist einstakur fjársjóður.
Fréttatilkynning um fornleifarannsóknina