Engin friðarverðlaun fyrir Trump
Setja bókamerki
Fjölmargir íbúar Suður-Kóreu eru ævareiðir út í Donald Trump Bandaríkjaforseta fyrir að aflýsa fyrirhuguðum fundi sínum með Kim Jong-un, leiðtoga Norður-Kóreu. Um sögulegan fund hefði verið að ræða þar sem leiðtogar ríkjanna tveggja hafa aldrei áður fundað.
Finnst mörgum Suður-Kóreumönnum að þeir hafi verið sviknir um einstakt tækifæri að friður komist á á Kóreuskaganum.
Trump tilkynnti í gær að ekkert yrði af fyrirhugðum fundi þeirra Kim í Singapore í næsta mánuði og sagði óviðeigandi að funda með Kim eins og er.
„Norður-Kórea var að gera allt sem hafðist verið krafist. Þeir voru jafnvel búnir að eyðileggja kjarnorkutilraunasvæði sitt,“ sagði suðurkóreski skrifstofustarfsmaðurinn Eugene Lim í samtali við Reuters. „Trump hefur engan áhuga á friði í okkar landi. Af hverju getur hann ekki bara leyft okkur Kóreuríkjunum tveimur að lifa í friði?“
Ráðamenn í Norður-Kóreu jöfnuðu í gær kjarnorkutilraunasvæði sitt við jörðu til að „tryggja gagnsæi varðandi það að kjarnavopna tilraunum hafi verið hætt“, sagði í yfirlýsingu Norður-Kóreu. Tugir erlendra fjölmiðla fylgdist með aðgerðunum.
Fjöldi háskólanema og kvenréttindasinna mótmæltu ákvörðun Trumps í Seoul, höfuðborg Suður-Kóreu, í gær. Kim Dong-ho, einn mótmælendanna, sagði ekki rétt að einangra Norður-Kóreu nú þegar ráðamenn þar séu að reyna að tengjast alþjóðasamfélaginu.
„Það erum við sem búum á Kóreuskaga sem munum þjást vegna gjörða þinna, Kaninn þinn,“ sagði Kim.
„Það er eins og Trump hafi rutt burt í einum vettvangi allri vinnu Kóreuríkjanna við að koma á viðræðum milli Bandaríkjanna og Norður-Kóreu, sagði skrifstofustarfsmaðurinn Yun Hae-ri. „Ég held að Trump sé ekki að fara rétt að ef hann vill vinna friðarverðlaun Nóbels.“
Moon Jae-in, forseti Suður-Kóreu, sem hafði unnið ötullega að því að koma á fundi Trumps og Kims, sagðist vera ráðvilltur vegna ákvörðunar Trumps og hvatti forsetann til að láta ekki þetta einstaka tækifæri renna sér úr greipum.
Ráðamenn í Norður-Kóreu lýstu því hins vegar yfir í gær að þau væru enn reiðubúin að ræða málin við Bandaríkin.
Handtekin eftir að tvö börn fundust látin
„Það þarf að vinna mikinn fjölda upp“
„Skýr skilaboð til Seðlabankans“
Skar höfuðleðrið af íslenskri konu
Tveir í bílnum sem lenti utan vegar
Hernaðaraðstoð samþykkt – Vopnasendingar í vikunni
Skiptir miklu meira máli en fólk grunar