Erlent | AFP | 14.6.2018 | 6:57 | Uppfært 20:04

Öryggisráðið fundar vegna Jemens

Hermenn hlynntir stjórnvöldum í Jemen í nágrenni Hodeida fyrr í þessum mánuði. AFP

Öryggisráð Sameinuðu þjóðanna mun koma saman í dag til viðræðna í kjölfar árásar stjórnarhers landsins á hafnarborgina Hodeida sem gegnt hefur lykilhlutverki í því að koma hjálpargögnum til almennra borgara í landinu.

Bresk stjórnvöld óskuðu eftir því að fundurinn færi fram fyrir luktum dyrum og er gert ráð fyrir að hann hefjist klukkan 16:00 að íslenskum tíma. Það verður í annað sinn sem öryggisráðið fundar í vikunni vegna Jemens.

Sameinuðu þjóðirnar hafa lýst yfir miklum áhyggjum vegna hernaðaraðgerðarinnar sem gæti sett í uppnám flutning á nauðsynjavörum og öðrum hjálpargögnum til milljóna manna í Jemen sem eru á mörkum hungursneyðar.

Boris Johnson, utanríkisráðherra Bretlands, hefur varað við því í yfirlýsingum vegna málsins að hernaðaraðgerðir í kringum borgina megi ekki hindra flutning hjálpargagna um höfn hennar. Stjórnarher Jemens og bandamenn hans hafi fullvissað breska ráðamenn um að þeim væri umhugað um mikilvægi þess.

Telja Hodeida nýtta til að smygla vopnum

Hodeida hefur verið á valdi uppreisnarmanna sem njóta stuðnings frá stjórnvöldum í Íran en um 70% af öllum innflutningi til Jemens fer um borgina. Stjórnarherinn heldur því fram að uppreisnarmennirnir noti hana til að smygla vopnum.

Fulltrúi Sameinuðu þjóðanna á svæðinu, Martin Griffiths, hefur staðið í viðræðum um að samtökunum verði falin umsjá Hodeida til þess að tryggja að greiða leið hjálpargagna um borgina. Hann hefur einnig reynt að fá deiluaðila að samningaborðinu.

Rúmlega 22 milljónir manna í Jemen þurfa á hjálpargögnum að halda. Þar af eiga 8,4 milljónir á hættu að deyja úr hungri að mati Sameinuðu þjóðanna sem hefur skilgreint ástandið í landinu sem versta ástand af þessum toga í heiminum í dag.

Stjórnarher Jemens hefur notið hernaðaraðstoðar frá Sádi-Arabíu og Sameinuðu arabísku furstadæmunum. Átökin í landinu hafa kostað hátt í 10 þúsund manns lífið og tugir þúsunda hafa særst í þeim.