Rússnesk stjórnvöld gagnrýna Norðmenn vegna áforma norskra stjórnvalda um að óska eftir verulegri fjölgun bandarísks herliðs í landinu. Norðmenn vilja tvöfalda fjölda bandarískra hermanna í landinu og færa aðsetur þeirra nær landamærum Noregs við Rússland.
Rússneska sendiráðið í Noregi skrifaði á Facebook-síðu þess að það hefði verulegar áhyggjur af þessum hugmyndum Norðmanna sem þeir greindu frá eftir fund níu NATO-ríkja með landamæri í austri.
Frá því á síðasta ári hafa verið 330 bandarískir hermenn í Vaernes í Mið-Noregi en þarlend stjórnvöld vilja fjölga þeim upp í 700 og færa herstöðina til Setermoen, um 420 kílómetrum frá Rússlandi.