Þýska lögreglan er nú að framkvæma húsleit í fjölbýlishúsi í Köln, þar sem grunur leikur á að maður frá Túnis hafi geymt banvæna eitrið rísin. Þýskir fjölmiðlar segja manninn, sem þeir nefna Sief Allah H, nú vera yfirheyrðan af lögreglu.
Lögreglan réðst inn í íbúð hans á þriðjudag og fann þá efni sem síðar reyndist vera rísin. Segir BBC grun leika á að hann hafi verið að undirbúa hryðjuverkaárás með eitrinu.
Rísin er eitur sem unnið er úr plöntu og er talið vera sex þúsund sinnum öflugra en blásýra. Korn af efninu, sem vegur aðeins 70 míkrógrömm, nægir til þess að ganga af manneskju dauðri. Segir þýska lögreglan magn efnisins sem fannst í íbúð mannsins hafa dugað í 1.000 eiturskammta.
Lögreglan hefur rýmt fjölbýlishúsið sem er í Chorweiler-hverfinu í Köln og stendur nú fyrir húsleit í tveimur íbúðum sem hinn grunaði leigði. Þá rannsakar hún einnig sex tómar íbúðir í húsinu sem og nokkur opin rými.
Að sögn þýskra yfirvalda stafar öðrum íbúum í húsinu ekki hætta af, en miklar líkur eru sagðar á að komið hafi verið í veg fyrir hryðjuverkaárás.
Rísin getur verið notað í duftformi og sem úði, en það fékk mikla fjölmiðlaathygli er það var notað til að myrða búlgarskan andófsmann, Georgi Markov, í London í Kalda stríðinu. Var hann stunginn í lærið með regnhlíf sem eitrinu hafði verið komið fyrir á.
Þýskir fjölmiðlar segja manninn hafa vakið athygli yfirvalda eftir að hann keypti 1.000 fræ af plöntunni sem geymir rísin og rafmagnskaffikvörn á netinu.