Donald Trump Bandaríkjaforseti segir skýrslu innra eftirlits dómsmálaráðuneytisins vera „stórslys“ fyrir James Comey, fyrrverandi forstjóra bandarísku alríkislögregluna FBI og stofnunina sjálfa. Í skýrslunni segir að Comey hafi ekki farið eftir reglum stofnunarinnar þegar hann annaðist rannsókn á Hillary Clinton árið 2016.
„Rannsókn innra eftirlitsins er stórslys fyrir Comey, skósveina hans og því miður fyrir FBI,“ skrifaði Trump á Twitter í morgun.
„Comey verður nú opinberlega minnst sem langversta leiðtogans í sögu FBI. Ég gerði þjóðinni stóran greiða með því að reka hann. Þetta er gott innsæi,“ bætti Trump við.
The IG Report is a total disaster for Comey, his minions and sadly, the FBI. Comey will now officially go down as the worst leader, by far, in the history of the FBI. I did a great service to the people in firing him. Good Instincts. Christopher Wray will bring it proudly back!
— Donald J. Trump (@realDonaldTrump) June 15, 2018
Dómsmálaráðuneytið sagði Comey hafa verið „óhlýðinn“ og ekki hafa farið eftir reglum stofnunarinnar. Engar sannanir hafi hins vegar fundist um pólitíska hlutdrægni við rannsóknina á tölvupóstum Clinton, mótframbjóðanda Donalds Trumps til forsetaembættis Bandaríkjanna.
Comey og FBI eru þó harðlega gagnrýnd í skýrslunni. Er Comey þar m.a. sagður ítrekað hafa ekki farið eftir reglum og starfsháttum stofnunarinnar og eru tveir starfsmenn sem heyrðu beint undir Comey sagðir hafa sýnt fram á vilja til að grípa til opinberra aðgerða til að hafa áhrif á sigurlíkur Trumps í kosningunum.
Þá er Comey sakaður um að hafa notað einkanetfang sitt í störfum sínum fyrir stofnunina og fer kaldhæðni þeirra ásakana ekki framhjá Clinton, sem var ásökuð fyrir að hafa geymt trúnaðargögn í einkapósthólfi sínu er hún var utanríkisráðherra.
„En tölvupóstarnir mínir,“ skrifaði Clinton á Twitter.
But my emails. https://t.co/G7TIWDEG0p
— Hillary Clinton (@HillaryClinton) June 14, 2018