Kvikmyndaframleiðandinn Harvey Weinstein hefur verið ákærður í New York í Bandaríkjunum fyrir kynferðisbrot gegn þriðju konunni í máli sem nær allt aftur til ársins 2006.
Áður hafði Weinstein verið ákærður fyrir nauðgun og fleiri kynferðisbrot gagnvart tveimur konum. Að þessu sinni er ákæran í þremur liðum. Annars vegar er Weinstein ákærður fyrir að hafa framið gróft kynferðisbrot, en svo er hann einnig ákærður í tveimur liðum fyrir að hafa sýnt af sér ógnandi kynferðislegt framferði í garð konunnar.
Í yfirlýsingu frá lögreglunni í New York er þeim hugrökku konum sem stigið hafa fram og leitað réttlætis þakkað sérstaklega fyrir.
Tugir kvenna í kvikmyndabransanum hafa sakað Weinstein um kynferðisofbeldi, þar á meðal nauðganir, en ásakanirnar hrundu af stað #metoo-herferðinni. Sjálfur hefur hann alltaf neitað þessum ásökunum.
Verði Weinstein fundinn sekur á hann yfir höfði sér allt að lífstíðarfangelsi.