Faðir fyrirliða landsliðs Nígeríu í knattspyrnu, John Mikel Obi, hefur verið látinn laus úr haldi mannræningja en honum var rænt í heimalandinu í síðustu viku.
„Michael Obi, faðir fyrirliða ofur-arnanna, er frjáls að nýju,“ sagði talsmaður lögreglunnar, Ebere Amaraizu, í Enugu-ríki í suðausturhluta Nígeríu við fréttamenn í gærkvöldi.
Ebere Amaraizu segir að mannræningjarnir hafi ekki gert Obi mein en honum var rænt á fimmtudagskvöldið í Enugu. Þeir neyddu hann til þess að ganga berfættan fimm kílómetra leið í úrhellisrigningu.
Hann segir að fyrirliðinn hafi greitt 10 milljónir naíra, sem eru um það bil 3 milljónir króna, í lausnargjald fyrir föður sinn. Enginn hefur verið handtekinn vegna málsins en lögreglan er á slóð mannræningjanna að sögn lögreglu.
Þetta er ekki í fyrsta skipti sem Obi er rænt því árið 2011 var honum rænt í borginni Jos. Mannrán eru tíð í Nígeríu og yfirleitt eru fórnarlömbin úr hópi fræga og ríka fólksins. Yfirleitt eru gíslarnir látnir lausir heilir á húfi eftir að lausnargjald hefur verið greitt.