Breska lögreglan mun velta við hverjum steini til þess að leiða til lykta hvað hafi valdið taugaeitrun tvímenninganna sem fluttir voru á sjúkrahús þungt haldnir eftir að hafa orðið fyrir Novichok-taugaeitrun undir lok síðustu viku.
Þetta sagði Theresa May, forsætisráðherra Bretlands, í morgun en hún er þessa stundina stödd í Þýskalandi í opinberri heimsókn. Fyrr í morgun sagði innanríkisráðherra Bretlands, Sajid Javid, tímabært að Rússar stigu fram og greindu frá því hvað væri á seyði.
„Það er augljóslega truflandi að sjá tvo einstaklinga til viðbótar verða fyrir Novichok-eitrun í Bretlandi. Ég veit að lögregla mun velta við hverjum steini í rannsókn sinni,“ sagði May en hún þakkaði sömuleiðis Angelu Merkel Þýskalandskanslara fyrir stuðning Þjóðverja í kjölfar þess að eitrað var fyrir rússneska gagnnjósnaranum Sergei Skrípal í mars á þessu ári.
Tvö voru flutt á sjúkrahúsið í smábænum Amesbury á laugardag, nærri borginni Salisbury, þar sem eitrað var fyrir Sergei og dóttur hans Yuliu Skripal.