Vildi láta drepa tvo í viðbót

AFP

Norska lögreglan handtók á þriðjudag 63 ára gamlan Óslóarbúa sem er sakaður um að hafa fyrirskipað morð og reynt að fá tvö morð til viðbótar framin í Pakistan. Hann verður væntanlega úrskurðaður í gæsluvarðhald síðar í dag.

Á blaðamannafundi norsku lögreglunnar í morgun kom fram að konan sem hann lét drepa var eiginkona hans í Pakistan. Konan var fertug að aldri og var önnur af tveimur eiginkonum hans. Þau áttu tvö börn saman en ekki kom fram á blaðamannafundinum hvort það voru börnin sem hann ætlaði að láta drepa.

Maðurinn hefur verið búsettur í meira en 40 ár í Noregi og á þar eiginkonu og börn. Hann gekk í hjónaband með hinni konunni árið 2006 í Pakistan en sú kona kom aldrei til Noregs, segir Anne Alræk Solem, sem stýrir rannsókninni.

Konan var myrt 31. maí í fyrra og var hún skotin til bana klukkan 7:30 að morgni er hún var á leið til vinnu. Norska lögreglan hefur unnið að rannsókn málsins í eitt ár.

Ástæðan fyrir morðinu er helsta viðfangsefni rannsóknarinnar, segir Sturla Henriksbø, saksóknari lögreglunnar í Ósló á fundi með blaðamönnum. Lögreglan telur að maðurinn hafi einnig fyrirskipað dráp á tveimur öðrum manneskjum í Pakistan en morðin voru ekki framin segir Solem. Ekki er annað upplýst um hverjar þær eru annað en að þær eru nákomnar manninum.

Morðið var framið í úthverfi Lahore, Shahdara, og var morðinginn yfirbugaður af vitnum á staðnum. Hann segir að beiðnin um morðið hafi komið frá Noregi og honum hafi verið heitið 100 þúsund rúpíum fyrir en aðeins fengið 11 þúsund rúpíur greiddar.

Frétt Aftenposten

mbl.is