Donald Trump segist litlar væntingar hafa fyrir fund sinn með Vladimír Pútín Rússlandsforseta sem fer fram í Helsinki í Finnlandi á morgun. Bandaríkjaforseti segir ekkert slæmt, og jafnvel eitthvað gott, geta hlotist af fundinum.
BBC greinir frá því að Trump ætli að spyrja Pútín út í Rússana tólf sem ákærðir hafa verið fyrir að brjótast inn í tölvukerfi Demókrataflokksins í aðdraganda forsetakosninganna árið 2016. Rússar hafa neitað ásökununum.
Trump segist þó ekki hafa íhugað að biðja um að mennirnir tólf verði framseldir til Bandaríkjanna, en engir framsalssamningar eru í gildi á milli landanna tveggja.
Margir hafa krafist þess að Trump aflýsi fundinum vegna ákæranna gegn rússnesku tólfmenningunum. Mótmælendur hafa streymt út á götur Helsinki og meðal annars kallað eftir mannréttindum og frelsi fjölmiðla.