Breskur karlmaður, sem lýsti yfir hollustu við Ríki íslams, var í dag fundinn sekur um að hafa undirbúið samsæri um að myrða forsætisráðherra Bretlands, Theresu May.
Naa'imur Zakariyah Rahman, 20 ára frá Norður-London, hafði áætlað að sprengja öryggishlið í Downing-stræti, embættisbústað forsætisráðherra, og ráðast síðan á May með hnífum.
Rahman var handtekinn í nóvember síðastliðnum á grundvelli hryðjuverkalaga. Hann taldi sig eiga í samskiptum við liðsmann Ríkis íslams, þar sem fyrirhuguð árás var rædd, en var í raun og veru að ræða við starfsmann bresku leyniþjónustunnar.
„Áður en Rahman var handtekinn taldi hann sig eingöngu þurfa nokkra daga til viðbótar áður en hann gæti framið hryðjuverkið,“ sagði saksóknari.
Rahman ræddi við leyniþjónustumanninn á samfélagsmiðli þar sem kom fram að hann vildi sprengja upp öryggishliðið á Downing-stræti og myrða forsætisráðherrann.