Handtekinn fyrir morð og að vanvirða lík

Lögreglan í Ósló hefur handtekið mann fyrir morð og að …
Lögreglan í Ósló hefur handtekið mann fyrir morð og að vanvirða lík. Maðurinn hefur áður hlotið 18 ára dóm fyrir morð. mbl.is/Atli Steinn Guðmundsson

Slökkviliðsmenn að störfum fundu lík í Maridalen í Ósló í Noregi um klukkan þrjú síðdegis í gær, reynt hafði verið að brenna líkið. Karlmaður hefur verið handtekinn grunaður um morð og fyrir að vanvirða lík. Maðurinn hefur áður hlotið dóm fyrir morð að því er fram kemur í umfjöllun Aftenposten.

Slökkviliðsmenn í Ósló voru kallaðir út síðdegis í gær eftir að tilkynnt hafði verið um eld. Þegar slökkviliðið mætti á staðinn reyndist hins vegar ekki um skógareld að ræða, eins og talið var í fyrstu, heldur fundu þeir lík sem bar þess einkenni að reynt hefði verið að brenna það.

Lögreglan hafði skömmu seinna hendur í hári 55 ára karlmanns sem fyrst um sinn var handtekinn fyrir að vanvirða lík. Lögreglan í Ósló tilkynnti síðan nú í morgun að maðurinn væri einnig grunaður um morð og að farið yrði fram á gæsluvarðhald yfir honum. Héraðsdómstóll Óslóar tekur gæsluvarðhaldsbeiðnina fyrir síðdegis í dag.

Maðurinn hefur áður komist í kast við lögin. Meðal annars hlaut maðurinn 18 ára dóm fyrir morð 1982 sem var framið í samverknaði við aðra og hefur hann einnig hlotið aðra dóma.

Segist saklaus

Anne Alræk Solem, hjá deild ofbeldisbrota lögreglunnar í Ósló, segir að ekki hafi enn verið borin kennsl á líkið og að rætt hefur verið við vitni sem voru nálægt staðnum þar sem líkið fannst. Tjaldsvæði er nokkur hundruð metra frá staðnum, en Maridalen er vinsælt útivistarsvæði borgarbúa.

Lögreglan segist ekki tjá sig um aldur hins látna eða önnur persónugreinanleg einkenni. Þá gefur lögregla ekki upp hvort hinn látni hafi hlotið einhverja áverka. Krufning mun fara fram í dag.

Verjandi mannsins, Fridtjof Feydt, segir við Aftenposten að skjólstæðingur hans segist saklaus í kærunum.

Maridalen er vinsælt útivistarsvæði rétt norðan við Ósló.
Maridalen er vinsælt útivistarsvæði rétt norðan við Ósló. Kort/Google
mbl.is
Fleira áhugavert
Fleira áhugavert